Guitar Tablature Note sim didan - SIMMUN I

TABLATURE SIMDAN || THUMAKAI

Guitar jil hodi'a avet bailam pen leh atum nop kisa pen chu TABLATURE NOTE hi ahi'e.

STAFF NOTATION kiti jong aum e ahivang in hichu jiltah bah a jil lou hodi'n vang ahah ma ma jeng'e, Guitarist minthang ma ma Jimmy Hendrix jieng in jong Note avethei poi atiu ahi'e.

ama vang chu abil pil ma ma jeng (by ear) chuleh adeidan ho chu colour ho mangcha'n asei ji'e, atiu ahie.

Guitar TABLATURE ahilou leh TAB hi Music jil ho adih a Guitar jil ho dia apoimo leh phatah ahi'e, hiche note hi abailam pen pen khat a vannoi in ahet leh Guitarist jouse'n jong bailam thet a ajilnum u Music piece hihen, ala deitah u hijongle hiche note akon'a hi ajil jieng thei na'u khat chu ahi.

Akipantil khat adi'n vang hahsa lheh nante, imajouse chu ikipattil leh hah di mong ahinai 😁

ahi'n Music hi Theory toh practicle ani a achekhom ngai ahi'n, ani tah a kilhondel del a jilkhom ngai ahi.

Music hi kilhem thei lou, ithep ithep lou jong ki bolthu (fake) thei hilou, natum themlou/nasah themlou leh athemlou nahijeng, sei a them hochu hitheilou ahi. Nabol natoh chun nahet na leh napan lah dan aphondoh chet chet joh ahi.

Hiche Simmun hi Book tamtah kive khom a, hetbailam thei di pen a, akipanntil ho dia hung kibol ahi. 

aban ban in anasim ute.

SIMMUN - I

TABLATURE hin Line gup jietlam apat veilam chan a kijih jangkei anei e, line gup hohi Guitar guiho (Guitar Strings) vetsah na ahi, Guitar a agui ngaat pen pen (smallest string) chu achung pen Line in akijih in 1st string akiti'e, hiti chun angaat pen apat alenpen chan chu number amin in akiputsah e. LINE kiguol det det in aban ban in gup tah akijih suh peh e. alien pen chan chu agui gup na (6th string) ahi'e.

TAB ah Guitar gui angat pen (1st string) chu achungnung pen line in akijih in, hiti chun aban a agui let cheh cheh dungjui in, anui nung pen pen alenpen chu gui gup na (6th string) ahi.

fig. Guitar gui vetsah na Tablature line, Guitar gui min holeh phat (measure) hopkhenna Bar line

• String ngaatpen siplou'a (open) 1st string khu E string ahi
• String aban a siplou'a (open) 2nd na khu B string ahi
• String aban a siplou'a (open) 3rd na khu G string ahi
• String alenjep kipat na siplou'a (open) D string ahi
• String alenpen ban tah a siplou'a (open) A string ahi
• String alen pen 6th string siplou'a (open) E string ahikit e.

BAR LINE

String isei ho'u apheilang (Horizon), veilang apat jiet lang'a kisun jangkei line khu ahita'n,

BAR LINE ahileh String line ho hopkhenna ahilou leh phat (measure) hopkhenna a kimang,

avai'a (Vertical) achung apat anuoi ahilouleh anuoi apat achung lam jon a kijih ahi.

BAR LINE ibol a kijih ham iti leh, hichi ho khu MEASURE khenna ahi'e.

NOTE :

• TABLATURE hi veilam apat jiet lam, thuguol isim bang'a (Left to Right) a kisim phei ahi.
• Guitar hehtuh (tuning) nabol di jongle, Keyboard a Guitar siplou'a (open) note kisei hokhu nameh'a agindan kibang'a naheh tuh ding ahi.

Ol ol a ijil diu ahi, thakhat a imajouse hegu te ihiuvin, hetjong ihe bai uve ahi'n aphatlou na chu gangchal a haimil kit leite ihiuvin, aphamo lheh ji'e. hiche Simmun adin hichan hiphot henlang, aban tieng neokhat khat a hahjep, ahivanga hetthei ding dol tah a isei kit diu ahi.

Kihilna hi hoi nasah le mi tampi'n aphatchuom pi tei nading'n, muntin ah share le le ute.