EQUALIZER (EQ)

Equalizer nahet nadia, Basic Sound nahet ngai ahi’e,

Gin (Sound) melput leh umdan link ah hin ve o
 Gin (Sound) hi ipi ham?

Khaile!

Equalizer masa pen pen chu 1920s lai RCA kiti mun a John Volkman in Cinema Hall a Cinema gin(sound) heh na a ana man Langevin Model EQ-251A chu ahi akiti.

EQUALIZER HI IPI HAM?

Amasa’n Sound leh Music lang tong jing khat in ahet dia poimo masa pen pen khat chu EQ hi ahie. ajih chu Sound iti tieng leh Mixer leh Speaker toh kivet beh jeng khat ahie na. Aleh Mixer imu mu a ivet masah pen jikhu EQ ki golsuh toh Volume Fader ahipen ji’e.

EQ seina ding in Audio Frequency neokhat ana ve ute, ihetthem nadiu vin. Mihiem in ijah thei (Human Audio Spectrum range) gin hi, agin pi pen pen a 20hz(hertz) apat 20khz(kilohertz) a sang gin ngat chan hi ahi akiti e. Eiho in ihet u agin pi (Bass) khu 20hz apat 100hz chan ho ahi’n, 100hz apat 1khz hochan khu gin lai (Mid/middle) tia ihet u ahi’n, chuleh 1khz apat 20khz chan khu gin ngat (Treble) a ihet u ahie. Bass,Mid leh Treble jong hop ni hop thum in aki hom kit ji’e.

Gin jousi akibang po’n, ahinlah mihiem in ijah thei gin jousi hi hichi Audio Spectrum sunga lha ahie. Ajih chu gin (sound) khat kiti pou pou hin gin pi (Bass), gin lai (Mid), gin ngat (treble) hi anei chih ahie.

Equalizer hi Bailam tah a sei din, Gin (sound) heh a agin danglam sah nathei manchah ahie. Iti lampang a dang lam a kiheh thei ham iti le, EQ akon bol thei tam tah lah in gahsei leu hen, Gin khat ibil adia thet um tah ahilou leh agin chu hiim (sharp) jeng jong khu ngeinop um tah a heh doh thei ahi.

Live sound system Concert/Hou-Inn ho’a jong seidin EQ mangcha a Gin ahungkhong (feedback) ho jeng jong khu heh mang thei, suhmang thei ahikit e.

EQUALIZER HI ITOBANG BANG UM HAM?

Analog Hardware based in sei leuhen. Equalizer hi Active EQ kiti aum in, Passive EQ kiti aum e.

1. Active EQ kiti pa khun naa atoh thei nadin electric meivah leh gin (sound signal) angai cha e. technology sang toh dungjui a, amanchah hojong neo intin, chuleh gihlou/jaang(light weight) ahi’n, aman (price) jong lhom jep tei ahi.

Active EQ ah hin frequency idei lai gin chu hehbe leh hehmang (boost or cut) bolthei ahie.

Passive EQ kiti pa khun naa atoh nadin Meivah ngai chalou in gin (sound) bou angai cha’e. asunga manchah ki mang hojong lenthei intin, gih jong gih jep tei ahi. Passive EQ meivah ngaicha lou pen hi aman jong atam tei e. Passive EQ ah hin idei lai frequency vang ki heh ging be thei lou, aumsa joh ki hehmang thei bou ahi.

EQUALIZER HI CHI (TYPES) IJAT UM AM?

Equalizer hi tulai khang hin, chi tam tah aum tae. ahi’n abul pi pe’n, adang jousi hung kuon doh/kisiem doh na chu chi ni ahie.

GRAPHIC EQUALIZER leh PAREMATRIC EQUALIZER ahi’e.

GRAPHIC EQ hi kiheh lou a kitol tho ahi. Frequency khel le le thei lou dia, aki siem apat aki tol nadi ho koituhsa a kisiem ahitai (fixed frequency band). Masang chun Octave Graphic EQ kiti 10 Band (atolna 10 um) 30 Hz, 60 Hz, 125 Hz, 250 Hz, 500 Hz, 1 KHz, 2 KHz, 4 KHz, 8 KHz, 16 KHz tia kikoi ki mang ana hi’e.

Tulai khang hi’n, 31 Band chan aum tai. PAREMATRIC EQ hi aman nop pen leh tulai khanga akiha man pen pen ahitai. Hiche Parematric Eq a hi gin(sound) frequency ideina mun lai lai kilhang thei (Graphic EQ bang hilou) ahi. Ama hin ahehna (knob) thum anei e. Aheh ging/ol nathei di (Gain), gin api (Bass) apat Gin ngaat (Treble) idei lai lai (Centre Frequency) lhen na thei di ahehna (knob) aum in chuleh Bell Curve kiti idei nalai gin (centre frequency) apat akiemvel sung ichan ahuop tha di ham ti toh ahehna (knob) anei e.

Analog Parmatric EQ hin Multi-band kiti achunga isei bang uva, Audio Spectrum sung 20hz apat 20khz chan abih bih in li (4) in akihom e. ginpi (Bass), gin lai (middle) jong ni in akihom in chuleh gin-ngaat(treble) ho koitohsa a um, hitia chu abih bih ajong ki hehthei in aum e.

MINIMUM PHASE EQ leh LINEAR PHASE EQ

Active hihen Passive EQ hijongleh aki design dungjui a, adih set a Parematric Equalizer a hi Minimum Phase Equalizer leh Linear Phase Equalizer kiti hi, ahina (features) lah a umthei ahi’e.

Achunga link kipe chu navet leh, Gin (Sound) hin Positive leh Negative phase anei chih ahi na? Minimum phase Equalizer a gin (sound) khat naheh le, hichi EQ chun Phase shift abol thei, hichun na gin (sound) chu deilou umtah a suohdoh thei, aki khel lamdang dan chu neocha, mohjah doh thei hilou (minute change) ahivanga gin (sound) chu ahoilou lam a akhel lamdang thei ahi’e.

Ahoina/aphatna khat chu ahileh ama hi CPU power ha ngaichat (consume) lou, chuleh latency umlou ahi kit e. Linear EQ ahi kit leh ama hi ahoina chu achunga kisei, Phase shift buina (problems) hochu umlou, ahivanga ahoi lou kit na chu ama hin CPU power aneh, chuleh latency umkit ahi’e.

Latency kiti hi Music tham jing ho dia thet um tah khat ahi’e.

EQUALIZER A IPI PI KIBOL THEI AM?

EQ hi isei banga gin (sound) khat sunga frequency idei be lai habbe thei ahilou leh heh-ol jep thei ahi, chuleh FILTERS kiti aum e.

Hichu High Pass Filter (HPF) kiti agin pi (Bass) langsi hehmang a agin ngat (Treble) langbou ginsah nathei manchah aum e.

Hichi bangma achu Low Pass Filter (LPF) kiti agin ngat (treble) langsi hehmanga, aginpi (Bass) langbou gin sah thei na manchah jong aum kit e.

Chuleh Band Pass Filter (BPF) kiti jong aum kit in, hichi hi ahileh HPF toh LPF kigom a iman tieng leh ginlai (Mid/Middle) bou chu ging ding, ginpi (Bass) leh gin-ngat (Treble) kisumang di tina ahi.

achunga isei ho’u jousi aman didan Kihilna (practicle tutorial) video akibol in vetthei hinte.